Ástarenglar

Til himins hljóð
við horfum
á minninganna myndir.
Þar ástar engla
eigum,
hugans ljúfu lindir.

jgr

Sorg

Sorgin er sólar
svarti koss
lagið og ljóðið
við lífsins kross.

Sorgin er sárið,
sálar und.
Hugurinn hljóður
helgar stund.

Sorg tengja sálu
systra bönd:
Til vonar þær vitja
um viljans hönd.

jgr

Sálarblær

Sálin er himinn
sérhvers manns:
og blærinn bærist
í brjósti hans.

jgr

Í náttstað fuglanna

I

Fuglar! himins fjör,
svo fögur unaðs sýn.
Er að þeim sækir svefn,
söngur þeirra dvín.
Að morgni heyra má
hið milda skógarhjal
og nærast enn á ný
af náttúrunnar mal.

II

Er sæll þá sefur fugl
í sólarvon um stund.
Logn í lundi og mó,
líkn við sálargrund.
Við hvítan mána hvíld,
hver ein planta höll.
Skrýðir þögnin skóg,
skýlir lífi þöll.

jgr

Værðarstundir

I

Við upphaf göngu þinnar
úr gæfulindum streymir.
Og undir verndarvængjum,
þú væntingarnar geymir.
Þá blómgast vor og angar
og værðarstundir langar
þig vísdómsorðin dreymir.

II

Í lífsins værðarlundi
þú leitar til að skilja.
Magnaður í raunum
er máttur afls og vilja.
Unaðsgrænar grundir,
og gullnar sælustundir
gráma dagsins hylja.

III

Við ferðalok þú hvílist,
í hvelfdum kyrrðarboga,
og veist að eilífð alla
mun ævisól þín loga.
Þú lítur farna vegu
í lífi yndislegu
við lygna himinsvoga.

jgr

(Værðarstundir er ljóð sérstaklega ort til uppsetningar í Værð, gönguleið og áningarstaði sem Lionsklúbburinn Ásbjörn í Hafnarfirði lét útbúa ofan Hvaleyrarvatns í Hafnarfirði með sérstökum styrk úr minningarsjóði Gísla S. Geirssonar.)

Elskast augu

Augun þín
svo yndisleg
af ást mér vísa
unaðs veg.
Orðin öll
þín augu tjá.
Tilfinningar
tærar sjá
elskendur
við ástar fund.
Þegar elskast augu
er eilíf stund.

jgr

Gjöf

Manni hverjum
að muna hollt er
hve sælt er að gefa
af sjálfum sér.

jgr

Spékoppur

Spékoppurinn
speglar kæti.
Hann á í gleðinni
hæsta sæti.
Hann er í andanum
yndislegur:
Gleðinnar ljómi
er lífsins vegur.

jgr

Ljósaleit

Þú bjartsýni brýnir,
þú býður mér far:
Nú ljósanna leitum
því lífið er þar.

jgr

(Ort til vinar míns, Guðjóns Sigurðssonar, formanns MND félagsins. Hann er okkur öllum ómetanleg fyrirmynd.)

Bros

Lítið barn
um litla kvos
leiddi pabba
sinn í hendi.
Sælan ljúf
og lítið bros
læddi í sál hans
blómavendi.

jgr