Milda ljós

Myrkan huga
mildar ljós,
máttur gliturs ljómar tær.
Sindrar himins
sálarrós,
sólu glæðir himnablær.

Vorþrá

Blómgast lundur,
brum í greinum,
blíðust unaðsstund.
Ástar fundur,
ósk í leynum,
yndi vekur grund.

jgr

Sannleiksþrá

Þú hyggur himins til,
heit þín lífsins þrá,
krossins gata greið,
geislar lífsins brá.
Þó ef aðeins þú
þráir sannleikann.
Tær og hrein og trygg,
þér trúin færir hann.

jgr

Vild

Í djúpri vitund vís
er vild um nýjan dag.
Styrkur trúar tær
tryggir sálarhag.
Veitir unaðs þrá
og yndi himins lag.
Breiðir hægt og hljótt
á heiminn lífsins brag.

jgr

Hugarlíkn

Er grætur himinn
gráir dagar
gæta vonarinnar.

Þú lygnir augum,
líkn er huga
loforð gæfu þinnar.

jgr 

Kvöld

Mildur og fagur,
ferðast hljótt:
Kveður dagur,
dimm er nótt.

Ljáðu eyra
lágum róm,
þá má heyra
þíðan hljóm.

Sálin viknar,
sárið grær.
Minning kviknar
kristalstær.

Mundu ljúfra
að leita fljótt.
Þiggðu að hjúfra
hjá þeim í nótt.

jgr

Dýrmætur dagur

Hver dagur þér strýkur
sem dýrmætur blær,
hver dagur er lífs okkar veldi.
Í deginum eina
hver dögun þín grær,
dagsvonin ljós þitt að kveldi.
Og dagurinn lifir
með dásemd, svo hljótt
sem demanti heimurinn skarti.
Mundu að svo fæðist
um myrkvaða nótt:
morgunninn dýrðlegi, bjarti.

jgr

Drýpur sól

Fjöll og heiðar,
himnagátt,
hljótt er þokubandið.
Dalalæðan
dvínar brátt,
drýpur sól á landið.

jgr

Ljóshöfn

Hugur þinn
er heimur efans
með viljans styrk
á valdi sínu.
En þér veginn
vísað getur
ljóssins höfn
í hjarta þínu.

jgr

Í núinu

Þótt nú dimmi
og dagi síðar
mun aftur birta
innan tíðar.

Ljúfra nátta
og lita gliturs,
dökkva njótum
en daga síðar.

 jgr